കപ്പ മത്തി

പരീക്ഷണത്തിനു വേണ്ട ചേരുവകൾ

കപ്പ                                                    -                   1/2 kg
മത്തി                                                  -                   3 വലുത്
തേങ്ങ ചിരകിയത്                             -                   1/2 മുറി
ചെറിയ ഉള്ളി                                     -                   5 എണ്ണം
പെരുംജീരകം                                    -                   1 ചെറിയ സ്പൂൺ
മുളക്പൊടി                                        -                   1 1/2 ടീസ്പൂൺ 
മഞ്ഞൾപൊടി                                   -                   1 ടീസ്പൂൺ
ഉപ്പ്, കറിവേപ്പില                              -                   ആവശ്യത്തിന്
വെളിച്ചെണ്ണ, കടുക്

പരീക്ഷിക്കേണ്ട വിധം

കപ്പ ഇടത്തരം കഷണങ്ങളായി മുറിച്ചത് ഒരു കുക്കറിൽ ഇടുക അതിനു മേലെ മത്തി നിരത്തി വെക്കുക. മുളക്പൊടി, മഞ്ഞൾപൊടി, പാകത്തിനു ഉപ്പ് എന്നിവ ചേർത്ത് വേവാൻ ആവശ്യമായത്ര വെള്ളവും ചേർത്ത് കുക്കർ അടച്ച് വേവിക്കുക(ഏകദേശം 2 വിസിൽ). മത്തിയുടെ മുള്ള് മാറ്റുക. കപ്പയും മത്തിയും കൂടെ നന്നായി ഉടച്ച് യോജിപ്പിക്കുക. തേങ്ങ ചിരകിയത്, പെരുംജീരകം, ചെറിയ ഉള്ളി, കുറച്ച് കറിവേപ്പില  എന്നിവ എല്ലാംകൂടെ വെള്ളം ചേർക്കാതെ നന്നായി അരക്കുക. അരപ്പ് കപ്പയിലേക്ക് ഒഴിക്കുക. ഒന്നു നന്നായി ചൂടാക്കുക. പാകത്തിനു ഉപ്പ് ചേർക്കുക. വെളിച്ചെണ്ണയിൽ കടുകും കറിവേപ്പിലയും പൊട്ടിച്ച് ഇതിൽ ഒഴിക്കുക.

പാവ് ബാജി

പരീക്ഷണത്തിനു വേണ്ട ചേരുവകൾ

പാവ് ബൺ                               -                  2

ഉരുളക്കിഴങ്ങ്                             -                  2

ഗ്രീൻ പീസ്, കാരറ്റ്, ബീൻസ്,

കോളിഫ്‌ളവർ എല്ലാം കൂടെ     -                   1 കപ്പ്

സവാള അരിഞ്ഞത്                  -                   1 വലുത്

വെളുത്തുള്ളി ചതച്ചത്               -                   1 വലിയ സ്പൂൺ

കാപ്‌സിക്കം അരിഞ്ഞത്         -                   1ന്റെ പകുതി

തക്കാളി അരിഞ്ഞത്                 -                   1

മുളകുപൊടി                               -                   1/2 ടീസ്പൂൺ

മഞ്ഞൾപൊടി                          -                   1/2 ടീസ്പൂൺ

പാവ് ബാജി മസാല                 -                   2 ടീസ്പൂൺ

ഗരം മസാല                              -                   1 ടീസ്പൂൺ

ചെറുനാരങ്ങ                             -                    1

ഉപ്പ്                                            -                    പാകത്തിന്

വെണ്ണ                                       -                    100 ഗ്രാം(ആവശ്യത്തിന്)

മല്ലിയില                                   -                    ആവശ്യത്തിന്

പരീക്ഷിക്കേണ്ട വിധം

ഒരു പാനിൽ വെണ്ണ ചൂടാക്കി പാവ്ബൺ മുറിച്ച് അതിന്റെ ഉൾഭാഗം ചെറുതായി മൊരിയിക്കുക.

ഉരുളക്കിഴങ്ങ് പുഴുങ്ങി പച്ചക്കറികൾ വേവിച്ചതും ചേർത്ത്  ഉടയ്ക്കുക. ഒരു പാനിൽ വെണ്ണ ചൂടാക്കി അതിൽ സവാള ചെറുതായി അരിഞ്ഞതും വെളുത്തുള്ളിയും ചേർത്ത് വഴറ്റുക. ഇതിലേക്ക് മുളക്പൊടി, മഞ്ഞൾപൊടി, പാവ്ബാജി മസാല എന്നിവ ചേർക്കുക. ചെറുതായി അരിഞ്ഞ് വച്ചിരിക്കുന്ന കാപ്‌സിക്കം, തക്കാളി എന്നിവ ചേർത്ത് നന്നായി വഴറ്റുക. പിന്നീട് വേവിച്ച് വച്ചിരിക്കുന്ന പച്ചക്കറികൾ ചേർക്കുക. പാകത്തിന് ഉപ്പും ചേർക്കുക. അവസാനം ഗരംമസാലയും ചെറുനാരങ്ങാനീരും ചേർത്ത് വാങ്ങുക. അൽ‌പ്പം മല്ലിയില തൂവി കുറച്ച് വെണ്ണ മുകളിൽ ചുരണ്ടിയിടുക. ചൂടൊടെ പാവ് ബണ്ണിനോടൊപ്പം വിളമ്പാം

ചിക്കൻ ഷവർമ

പരീക്ഷിക്കേണ്ട വിധം


ഒന്നാം ഘട്ടം

1/2 കപ്പ് വിനാഗിരി, 1/4 കപ്പ് തൈര്(ഒരു തുണിയിൽ ഒഴിച്ച് കെട്ടിത്തൂക്കിയിട്ട് വെള്ളം മുഴുവൻ കളഞ്ഞത്), 1 ടേ.സ്പൂൺ ഓയിൽ, ഉപ്പ് & കുരുമുളക് പൊടി ആവശ്യത്തിന്, 1 ടീസ്പൂൺ മിക്സ്‌ഡ് സ്പൈസ്( ഗരം മസാല), 1/4 ടീസ്പൂൺ ഏലക്കപൊടി, 8 ചിക്കൻ കാല് തൊലി നീക്കിയത്
ഇതെല്ലാം കൂടെ നന്നായി മിക്സ് ചെയ്ത് ഒരു രാത്രി ഫ്രിഡ്ജിൽ വെക്കുക.
 
അവ്ൻ 175 ഡിഗ്രിയിൽ(c) പ്രീഹീറ്റ് ചെയ്യുക. മാരിനേറ്റ് ചെയ്ത ചിക്കൻ ഒരു ബേക്കിങ്ങ് ട്രേയിൽ വച്ച് അലുമിനിയം ഫോയിൽ കൊണ്ട് മൂടി 30 മിനിറ്റ് ബേകെ ചെയ്യുക. പിന്നീടതെടുത്ത് മറിച്ച് വെച്ച് വീണ്ടും ഒരു 15 - 20 മിനിറ്റ് വരെ ബേക്ക് ചെയ്യാം. ട്രേയിൽ നിന്ന് മാറ്റി ചെറുതായി നുറുക്കുക. വേണമെങ്കിൽ ഒരു പാനിലിട്ട് എണ്ണയില്ലാതെ ഒന്നു നന്നായി മൊരിയിച്ചെടുക്കുക.


രണ്ടാം ഘട്ടം

സോസ്

1/2 കപ്പ് തഹിന (വെളുത്ത എള്ള് അരച്ചത്), 1/4 കപ്പ് തൈര്, 1/2 ടീസ്പൂൺ വെളുത്തുള്ളി തീരെ ചെറുതായി നുറുക്കിയത് (ആവശ്യമെങ്കിൽ മാത്രം), 2 ടേ.സ്പൂൺ നാരങ്ങാനീര്, 1ടേ.സ്പൂൺ ഒലിവ് ഓയിൽ, 1ടേ.സ്പൂൺ പാഴ്സ്‌ലി അരിഞ്ഞത്(ആവശ്യമെങ്കിൽ), ഉപ്പ്&കുരുമുളക്പൊടി ആവശ്യത്തിന്.
ഇതെല്ലാം കൂടെ നന്നായി മിക്സ് ചെയ്ത് വെക്കുക.

4 തക്കാളി കനംകുറച്ച് അരിഞ്ഞത്, 1/2 കപ്പ് സവാള(സാലഡ് സവാള ആണെങ്കിൽ നല്ലത്)അരിഞ്ഞത്, 4 കപ്പ് ലെറ്റൂസ് അരിഞ്ഞത്, 8 കുബ്ബൂസ് അല്ലെങ്കിൽ ചപ്പാത്തി

മൂന്നാം ഘട്ടം

ഒരു കുബ്ബൂസിൽ ചിക്കൻ നുറുക്കിയത്, തക്കാളി,സവാള, ലെറ്റൂസ് എന്നിവ വെക്കുക. അതിനു മേലെ തഹിന മിശ്രിതം ഒഴിച്ച് പാഴ്സ്‌ലി വിതറി കുബ്ബൂസ് ചുരുട്ടുക.

പാവയ്ക്ക തീയൽ

പരീക്ഷണത്തിനു വേണ്ട ചേരുവകൾ

പാവയ്ക്ക(കൈപ്പയ്ക്ക)        -       2

തേങ്ങ ചിരകിയത്                   -       1/4 cup

മല്ലിപ്പൊടി                                -       1 വലിയ സ്പൂൺ

മുളക് പൊടി                             -        1 1/2 സ്പൂൺ

മഞ്ഞൾപൊടി                         -         1/2 ചെറിയ സ്പൂൺ

വാളൻപുളി                                -       ഒരു ചെറിയ നാരങ്ങാവലുപ്പത്തിൽ

ഉപ്പ്                                           -      പാകത്തിന്

കടുക്, കറിവേപ്പില, വെളിച്ചെണ്ണ  താളിക്കാൻ ആവശ്യത്തിന്.


പരീക്ഷിക്കേണ്ട വിധം

ഒരു ചട്ടി അടുപ്പിൽ വച്ച് ചൂടാകുമ്പോൾ ഒരു തുള്ളി വെളിച്ചെണ്ണ ഒഴിച്ച് അതിലേക്ക് തേങ്ങ ചിരകിയതിട്ട് വറുക്കുക. തേങ്ങ ചെറുതായി മൂത്ത് വരുമ്പോൾ മല്ലിപ്പൊടി, മുളക്പൊടി, മഞ്ഞൾപ്പൊടി എന്നിവ ചേർത്ത് നന്നായി വറുക്കുക. കറിവേപ്പിലകൾ കൂടെ വേണമെങ്കിൽ വറുക്കുന്നതിൽ ചേർക്കാം. അതൊന്നു ചൂടാറുമ്പോൾ നന്നായി അരച്ചെടുക്കുക. ഒരു മൺകലത്തിൽ ഒരിത്തിരി വെളിച്ചെണ്ണ ഒഴിച്ച് കുരുവെല്ലാം കളഞ്ഞ് കനം കുറച്ചരിഞ്ഞ പാവയ്ക്ക ഇട്ടു നന്നായി വഴറ്റുക(കയ്പ്പക്കയുടെ കയ്പ്പ് കുറഞ്ഞ് കിട്ടുംന്ന് പറയുന്നു ഇങ്ങനെ ചെയ്താൽ). പിന്നീട് അരപ്പും പാകത്തിനു വെള്ളവും ഉപ്പും പുളി പിഴിഞ്ഞതും ചേർത്ത് അടുപ്പിൽ വച്ച് വേവിക്കുക. കയ്പ്പ് അധികമാണെങ്കിൽ ഒരു നുള്ള് ശർക്കരയൊ പഞ്ചസാരയൊ ഇടുക. കയ്പ്പക്ക വെന്ത് കറി പാകത്തിനു കുറുകിക്കഴിയുമ്പൊ അടുപ്പിൽ നിന്നിറക്കി കടുകും കറിവേപ്പിലയും താളിച്ചൊഴിക്കുക.

ഇഞ്ചിക്കറി

101 കറികൾക്ക് തുല്യം എന്നു പറയപ്പെടുന്ന  ‘ഇഞ്ചിക്കറി’ യിൽ നിന്നു തന്നെ ആകട്ടെ തുടക്കം


പരീക്ഷണത്തിനു വേണ്ട ചേരുവകൾ

ഇഞ്ചി                 -   ഒരു വലിയ കഷണം തൊലി കളഞ്ഞ് തീരെ ചെറുതായി നുറുക്കിയത്.
പച്ചമുളക്           -  2 ഓ 3 ഓ എരിവിനു അനുസരിച്ച്
മുളക് പൊടി       -  ഒരു വലിയ സ്പൂൺ ( കാശ്മീരി ചില്ലി ആണെങ്കിൽ കൂടുതൽ നല്ലത്)
ചെറിയ ഉള്ളി     -   5 ഓ 6ഓ എണ്ണം
മഞ്ഞൾപ്പൊടി    -  2 നുള്ള്
വാളൻ പുളി         -   ഒരു ചെറിയ നാരങ്ങാവലുപ്പത്തിൽ
ശർക്കര              -   1 കഷണം(മധുരത്തിനു അനുസരിച്ച്)
ഉലുവപ്പൊടി       -   1 നുള്ള്
അരിപ്പൊടി         -   1 നുള്ള്
കറിവേപ്പില, കടുക്, വെളിച്ചെണ്ണ, ഉപ്പ്  ആവശ്യത്തിനു.


പരീക്ഷിക്കേണ്ട വിധം

ഇഞ്ചി കുറച്ച് വെള്ളത്തിൽ ഒന്നു തിളപ്പിക്കുക. ആ വെള്ളം ഊറ്റി കളയണം. പകുതി ഇഞ്ചി മാറ്റി വച്ച് ബാക്കി പകുതി ഒരു ഫ്രൈപാനിൽ കുറച്ച് വെളിച്ചെണ്ണ ചൂടാക്കി അതിൽ ഇട്ടു വഴറ്റുക. അതിലേക്ക് ചെറിയ ഉള്ളി മുറിച്ചതും പച്ചമുളകും ചേർക്കുക. ഒരു നുള്ള് അരിപ്പൊടിയും ചേർക്കുക. നന്നായി വഴറ്റി അടുപ്പിൽ നിന്നും മാറ്റി തണുക്കുമ്പോൾ നന്നായി അരച്ചെടുക്കുക.

വീണ്ടും അടുപ്പിൽ ഒരു പാൻ വച്ച് (മൺകലം ആണെങ്കിൽ നല്ലത്.) വെളിച്ചെണ്ണ ചൂടാക്കി അതിൽ കടുകും കറിവേപ്പിലയും ഇട്ടു പൊട്ടിക്കുക. ബാക്കി ഇഞ്ചി ഇതിലേക്കിട്ട് വഴറ്റി മുളക്പൊടി മഞ്ഞൾപൊടി എന്നിവ ചേർക്കുക. അരച്ച് വച്ച ഇഞ്ചിക്കൂട്ട് ചേർക്കുക. വീണ്ടും നന്നായി വഴറ്റുക. ആവശ്യമെങ്കിൽ വെളിച്ചെണ്ണ ഒഴിച്ച് കൊടുക്കുക.  പുളി അൽ‌പ്പം വെള്ളത്തിൽ പിഴിഞ്ഞ് ഒഴിക്കുക. മധുരത്തിനു അനുസരിച്ച് ശർക്കര ചീകി ഇടുക. ഉപ്പ് ചേർക്കുക. നന്നായി തിളച്ച് കുറുകിക്കഴിയുമ്പോൾ  ഉലുവപ്പൊടി വിതറി അടുപ്പിൽ നിന്നിറക്കുക.

(ഇത് ഒന്നു രണ്ട് ദിവസം ഇരിക്കുമ്പോളാണു സ്വാദ് കൂടുക.)

എന്റെ പരീക്ഷണ ശാലയിൽ നിന്ന്.....

ഇതിൽ  എഴുതുന്ന പാചക കുറിപ്പുകളിലൊന്നും ഒരു പുതുമയും ഞാൻ അവകാശപ്പെടുന്നില്ല. മിക്കതും എല്ലാവർ‌ക്കും അറിയാവുന്നവയാണു. എന്നാലും  എന്റേതായ ചില മാറ്റങ്ങൾ വരുത്തി കുറച്ച് എളുപ്പമാക്കിയിട്ടുണ്ട്. ഇതിലെ മസാലകളുടെ  അളവുകളൊക്കെ ഓരോരുത്തരുടെ മനോധർമ്മം പോലെ ആകാം. ചില വിഭവങ്ങളുടെ മാത്രം ചേരുവകൾ കൃത്യമായ അനുപാതത്തിൽ ചേർക്കണംന്നുള്ളു.  പരീക്ഷിച്ച് അഭിപ്രായങ്ങൾ അറിയിക്കുക....